Tahira Tahirova

Tahira Akbar qizi Tahirova (Azerbaijani: Tahirə Əkbər qızı Tahirova, Russian: Таи́ра Акпе́ровна Таи́рова; 7 November 1913 – 26 October 1991) ita yar siyasar Soviet kuma diplomat. Tayi aiki a matsayin Ministar kasar waje na Azerbaijani Soviet Socialist Republic daga shekarar 1959 zuwa 1983.

Ita ce mace ta farko ta Azerbaijan da ta sami ilimi mafi girma a masana'antar mai.

Rayuwa ta farko

An haifi Tahirova a ranar 7 ga watan 7 Nuwamba 1913 a Bayram-Ali (a halin yanzu a Turkmenistan). Bayan kammala karatunta daga Azerbaijani State Oil Academy (a lokacin Cibiyar Masana'antu ta Azerbaijan) a 1935, ta zama mace ta farko ta Azerbaijan da ta sami digiri na ilimi mafi girma da ya shafi masana'antar mai. A shekara ta 1940, an nada ta darakta na Cibiyar Nazarin Kimiyya ta Azerbaijan . Daga 1942 zuwa gaba, ta yi aiki a kwamitin tsakiya na Jam'iyyar Kwaminis ta Azerbaijan kuma tana da alhakin isar da man fetur a kan lokaci ga Sojojin Soviet da ke yaƙi da abokan gaba a fagen fama a lokacin yakin duniya na biyu . A shekara ta 1949, ta fara koyar da darussan kan binciken rijiyar mai da ci gaba a Kwalejin Man Fetur ta Azerbaijan kuma a shekara ta 1953 ta sami digirin digirgir.

Ayyukan ta na siyasa

Farawa daga shekarar 1954, Tahirova ta rike manyan mukamai daban-daban a Majalisar Ma'aikata ta Azerbaijan, Majalisar Ministocin Azerbaijan SSR . A shekara ta 1957, an nada ta a matsayin Ministan Harkokin Waje na Azerbaijan SSR . Duk da yake, aikinta bai fara ba sai a shekarar 1959 lokacin da ta kammala karatu daga Kwalejin diflomasiyya ta Ma'aikatar Harkokin Waje ta USSR. Dangane da dokokin Soviet na wannan lokacin, Ministan Harkokin Waje na jamhuriya ta Tarayyar ya kuma kula da sauran ayyukan gwamnati. A lokacin da take mulki, ta yi nasara wajen raba ayyuka kuma bisa ga bukatarta, an cire ta daga ƙarin mukamai a cikin gwamnati a shekarar 1968 kuma ta mai da hankalin ta ga aikin diflomasiyya. An san Tahirova da kawo karin jami'an diflomasiyyar Azerbaijan zuwa sabis na kasashen waje na Tarayyar Soviet da kuma makarantar diflomasiyya ta Ma'aikatar Harkokin Waje. Sau da yawa ta kasance memba na ƙungiyoyin diflomasiyyar Soviet a zaman Babban Taron Majalisar Dinkin Duniya . Baya ga wannan, a matsayin matsakanci, Tahirova ta jagoranci ƙungiyar zaman lafiya ta Soviet a lokacin Yaƙin Iran-Irak na 1980-1988.

Kyaututtuka

A shekarar 1976, an ba Tahirova lambar yabo ta Order of Friendship of Peoples saboda gudummawar da ta bayar ta musamman ga ofishin kasashen waje na USSR da kuma Order of the Red Banner of Labour, Order of Lenin, Order of the Badge of Honour . Ta iya yaren Turkiyya, Turanci da Rasha.

Tahirova ta mutu a ranar 26 ga watan Oktoba shekarar 1991. An kwantar da ita don hutawa a Avenue of the Honored Ones Cemetery .

Iyali

Tahirov na daga cikin Tahirovs, ɗaya daga cikin manyan iyalai na Shusha. Ta kasance dangi na sanannen mawaki na Azerbaijan Fatma Khanum Kamina da Mirza Hasan Tahirzadeh, Sheikh ul-Islam na huɗu na Caucasus .